Një burrë rreth 50 vjeç u filmua në aeroportin “Nënë Tereza” në tiranë duke i mësuar tre djemve si të sillen gjatë fluturimit të tyre të parë.

Ishte 2 janari i 2014, kur policia shqiptare ndaloi djemtë e rinj të cilët do të fluturonin për në Siri në betejë.

Njëri prej tyre kishte një letër me shkrim dore ku lexohej “Tiranë-Stamboll-Gaziantep-Kilis. 750 dollarë i takojnë familjes së Ebu Amar”.

Letra përshkruante rrugën që duhet të ndiqnin xhihadistët e rinj për të mbërritur në Siri.

Shuma e parave ishte një “kontribut për vëllezërit myslimanë në Tiranë dhe jetimët e Diamant Rashës, i cili jeton ende në kampet siriane.”

Rasha i cili mori nofkën Ebu Amari, ishte një shpërndarës picash në Tiranë i cili vdiq në 28 dhjetor 2013 duke luftuar për ISIS në Siri.

Gjurmimi për financimet e xhihadistëve shqiptarë që luftojnë në Siri prej 2012 deri në 2014 rezultoi një sfidë e vështirë për Prokurorinë e Krimeve të rënda shqiptare e cila po heton një grup prej 13 të dyshuarish që u arrestuan në mars.

Dokumentat e hetuesisë ë BIRN ka siguruar tregojnë se burimi për financimin e 90 shqiptarëve që luftojnë në Siri është ende një mister.

Pagesat e identifikuara nga hetuesit ishin bërë për të mbuluar biletat e fluturimit ose për të ripaguar borxhet që xhihadistët kishin marrë para se të niseshin në luftë.

Nga 13 personat e arrestuar, 4 prej tyre përballen me akuzën e financimit të xhihadistëve të ardhshëm.

Sipas zyrës së Prokurorisë, premtimi i shpërblimeve të përjetshme ishte “bonusi” kryesor për xhihadistët shqiptarë që iu bashkuan Al Kaedas dhe Shtetit Islamik.

Hetimi i rrjetit të shpërndarjes së parave

Në janar 2014, policia turke bastisi zyrat e një organizate bamirëse “Humanitarian Relief Foundation” në Stamboll dhe Gaziantep, pasi dyshoheshin për financimin e xhihadistëve të huaj.

Autoritetet siriane kanë akuzuar këtë organizatë për financimin e qindra shqiptarëve që shkuan në Siri për të luftuar presidentin Bashar al Assad.

Gjithsesi Prokuroria në Shqipëria ende nuk ka zbuluar lidhjet e transfertave të organizatave të ngjashme drejt dy imamëve shqiptarë Genci Balla dhe Bujar Hysa.

Hetuesit kanë verifikuar transaksionet bankare në Shqipëri dhe gjetën se dy imamët morën shuma të mëdha parash nga individë nga Turqia, por jo nga organizata.

Fluksi i transaksioneve bankare niste që prej 2010-ës kur u transferuan shumë prej 3 mijë dhe 5 mijë eurosh në llogaritë e Ballës dhe Hysës.

Transfertat vlerësoheshin si donacione për xhamitë, por identiteti i këtyre trasnfertave “filantropike” mbetet ende i paqartë.

Një burim pranë Prokurorisë tha për BIRN se shumica e donacioneve për shqiptarët xhihadistë nuk ishin më shumë se 200 apo 300 euro.

Dy imamët kanë deklaruar se paratë ishin të destinuara për të ndërtuar xhamitë në Tiranë.

“Ne nuk mund të faktojmë se dy imamët kanë përfituar financiarisht nga ndonjë organizatë turkë ose organizatë lokale të vendosur në Lidnjen e Mesme”,- tha burimi për BIRN.

Përveç transfertave bankare hetuesit kanë investiguar edhe udhëtimet për në Kosovë mes 2012 deri në 2014 të dy imamëve, të cilët konsiderohen krerët e rrjetit të rekrutimeve në Shqipëri.

Kjo periudhë koinçidon me ngritjen e numrit të xhihadistëve shqiptarë që iu bashkuan “Al Nusras” dhe ISIS në Siri.

Ka dyshime se paratë erdhën ilegalisht nga Kosova, por është e vështirë të provohet.

Dokumentat e hetuesve zbuluan se xhihadistët shqiptarë furnizoheshin me para edhe në Siri, por gjithashtu shuma të konsiderueshme parash u jepeshin edhe familjeve të shqiptarëve të vrarë në Siri.

Ashtu si në rastin e Rashës, paratë ishin dërguar nëpërmjet njerëzve që shkonin apo vinin nga fronti.

Në një përgjim të 27 tetorit të 2013, një xhihadist i sapoardhur në Siri pyeti imamin se si duhet t’i ndante paratë e marra.

“Jepi 200 euro Ebu Enesit dhe 100 euro Hasan Korvafajt”,- iu përgjigj imami.

Emri i vërtetë i Enesit ishte Hamit Myslija, i vrarë në Siri disa ditë para se të kryhej kjo telefonatë.

Një biletë vetëm vajtje për në luftë

Pavarësisht kostos së ulët të jetesës në Siri, xhihadistët shqiptarë kanë nevojë për para për të shkuar atje.

Bileta avioni, pagesa për armë ose kosto jetese, për familjet etj, kushtojnë me mijëra euro. Imamët e arrestuar nuk mund të përballonin vetë gjithë pagesat.

Sipas BIRN, imamët dhe ndjekësit e tyre ndanë shpenzimet në bazë të parimit se financimi i xhihadistëve ishte njësoj si të sakrifikonin vetë për xhihadin.

Shumë xhihadistë shqiptarë morën borxhe apo shitën shtëpi për t’iu bashkuar xhihadit.

Një prej tyre, Shkëlzen Dumani i cili vdiq në 5 nëntor 2014 shiti shtëpinë për të shkuar në Siri.

Para se të nisej, Dumani bleu biletat për vete dhe dy xhihadistë të tjera, dhe një pjesë të parave ia la imamit Hysa.

Përveç biletave dhe kostove të tjera, xhihadistët shqiptarë kanë nevojë edhe për para për të jetuar në Siri.

Ata kanë ushqim dhe veshje, por u duhen edhe para për nevoja personale.

Ata që kanë vendosur të qendrojnë në Siri, kanë shitur shtëpitë e tyre në Shqipërië ndërsa të tjerë kanë mbijetuar si të mundin.

Pagesa mujore e tyre ka qenë rreth 150 dollarë në muaj për familje.

Megjithatë nëj xhihadist i cili u kthye në Shqipëri tha për BIRN se është një jetë e vështirë në Siri.

“Nuk kishte ushqim mjaftueshëm. Nuk kishim dushe dhe nuk laheshim për një muaj pasi ishte shumë ftohtë. Ishim të bashkuar në besim, dhe ndaj ndanim gjithçka bashkë, edhe kafshatën e fundit”,- tha ai./BIRN/

Nga Artan Hoxha

…nje prokuror i shtetit, 23 vite karriere nga viti 1992-2015(sidoqofte karriera e tij, e mire apo e keqe), arrestohet live nga nje skuader e patrullave “Shqiponja” ne mes te qytetit, dhe pamjet shperndahen ne te gjitha mediat ne kohe rekord…per ata qe nuk e njohin, Haxhi Giu eshte prokurori qe kryesoi grupin hetimor per çeshtjen “Hajdari”, qe kerkoi burgim te perjetshem per Jaho Mulosmanin dhe Izet Haxhine, qe i kerkoi gjykates ne pretencen e organit te akuzes, se “ekzekutimi i Azem Hajdarit u be per motive politike”, kurse gjykata vendosi se “vrasja e Azem Hajdarit u be per motive gjakmarrje”…

Ne vitin 2008 ish-prokurorja e pergjithshme Ina Rama e transferoi nga Prokuroria e Pergjithshme ne prokurorine e Krujes….

Fakti se ligji po vepron edhe ndaj njerezve te drejtesise eshte nje lajm i mire….

Por ngutja per te publikuar pamjet e arrestimit te nje prokurori ne kohe rekord, le nje shije te keqe…

Prokurori, si çdo qytetar i thjeshte, prezumohet i pafajshem per sa kohe ne adrese te tij nuk ka nje vendim gjykate te formes se prere…

Publikimi i pamjeve te nje arrestimi demonstrativ, ndaj nje qytetari te padenuar nga gjykata perben nje shkelje te kodit etik te policise, privim te te drejtave te individit kur ndaj tij nuk ka nje vendim gjyqesor, etj…

Policia mund ta arrestonte ne zyren e tij te punes. ne banese, apo ta therriste per te dhene deklarime ne polici a prokurori dhe ne fund te procedures ti komunikonte arrestimin…

Prokurori Giu, nuk kishte dhene asnje shenje se po i shmangej hetimit, se mund te prishte apo manipulonte provat e ceshtjes hetimore, se mund te largohej jashte vendit, apo se perbente kercenim serioz per rendin dhe sigurine ne vend….

Pse policia dhe prokuroria e kane miratuar kete procedure demaskimi publik per rastin e prokurorit Giu?!!!!

Nuk e ve doren ne zjarr ne eshte apo jo i korruptuar prokurori Giu, kete gje e vendos gjykata. Por nje gje e di mire, ai nuk eshte ne top-listen e prokuroreve me te korruptuar te organit te akuzes, as ne top-listen e prokuroreve qe ka perdorur me shume politika per te mbyllur hallet e veta apo per te ndeshkuar kundershtaret, edhe pse kur drejtonte hetimin e çeshtjes “Hajdari”, Giu etiketohej si prokuror i djathte.

Me krah te lehte te qofte burgu Haxhi!!!! Ishallah nuk te çojne ne te njejtin burg me Jaho Mulosmanin dhe Isamedin Haxhine?!!!

Me sa di, ata kane ca fjale qe duan te ti thone nga afer dhe nuk duan ta humbin kete rast…..

(Sa per kujtese, ne rastet kur policia ka nxituar te shperndaje pamje, te cilat tregonin se po godiste lart ne hierarkine shteterore dhe po arrestonte peshqit e medhenj te korrupsionit, si ne rastin e Gjeneral Brigade Syrja Gjoka dhe guvernatorit te Bankes se Shqiperise, Ardian Fullani,…perfundimi ka qene nje bllof i madh, ne te dyja rastet te arrestuarit kane dale te pafajshem).

Policia italiane ka finalizuar operacionin “Fast and Furious”, që ka çuar në pranga katër shqiptarë të cilët akuzohen për disa grabitje në Udine, por edhe në Veneto dhe Emilia Romagna.

Hetimet për grupin e grabitësve shqiptarë nisën në shtator pasi kryen dy grabitje në Latisana dhe Paludo.

Shqiptarët jetonin në Bolognia ndërsa bazën e tyre e kishin në Emilia.

Pas mbledhjes së dëshmive të banorëve të zonës dhe shqyrtimit të pamjeve të kamerave të sigurisë, karabinierët italianë kanë rënë në gjurmët e grupit të hajdutëve.

Policia zbuloi një autoveturë tip Golf e grabitur dhe me targa që i përkasin një tjetër automjeti.

Por, zbulimi i katër shqiptarëve erdhi pasi grabitën flori, sende me vlerë dhe një Audi A8 një biznesmeni italian.

Policia zbuloi se grupi fshihej në San Pietro në Casale. Gjatë ndjekjes, ata kanë udhëtuar deri në 200 km/h me makinën e vjedhur, për këtë arsye dhe operacioni mori emrin si filmi i famshëm “Fast and Furious”.

Në pranga kanë përfunduar Aurel Leka, 24 vjeç, Oltion Balozi, 25, Admir Ruçi, 21 dhe Arben Perskura, 28. Nga kontrolli në një apartament policia gjeti sende të grabitura, vlera e të cilëve arrin në rreth 200 mijë euro.

Operacioni i policisë, që u finalizua me kapjen e tyre, është koduar “Fast and Furious”, për shkak të shpejtësisë 200 km/orë me të cilën udhëtonin në autostradë me makinat e vjedhura./Marre nga shqiptarja.com

Policia publikon arrestimin live të prokurorit Haxhi Giu, i cili kishte marrë përsipër lehtësimin e akuzës për një të akuzuar për trafik të lëndëve narkotike. Sipas prokurorisë, vëllai i të pandehurit kishte lënë si garanci një shumë parash në një pikë këmbimi valutor në Tiranë, por ato nuk u morën nga prokurori, pasi i pandehuri u dënua me 8 vjet burgim.

Një prokuror me eksperiencë 23-vjeçare në organin e prokurorisë përfundoi në pranga pasditen e djeshme si i akuzuar për korrupsion.

Haxhi Giu, i njohur si prokurori i dosjes “Hajdari”, u arrestua live nga policia e kryeqytetit pas një urdhër-arresti të lëshuar nga Gjykata e Krimeve të Rënda.

Ai akuzohet se kishte premtuar lehtësimin e akuzave për një të pandehur për trafik të lëndëve narkotike në këmbim të një shume parash, që sipas prokurorisë mbetet ende e panjohur.

Ndërsa policia thotë se janë 29 mijë euro dhe janë sekuestruar tashmë. Për të garantuar marrjen e parave, prokurori dhe vëllai i të pandehurit i kishin lënë  si garanci në një pikë këmbimi valutor në Tiranë dhe do të merreshin nga prokurori pasi të jepej vendimi ndaj shtetasit Paulin Shpori, i akuzuar nga prokuroria e Krujës për trafik të lëndëve narkotike.

Fillimisht prokurori i ka thënë vëllait të të pandehurit se çështja është e vështirë për shkak të pozitës së tij, por pas “garancisë me paratë” ai ka ndryshuar qëndrim dhe sipas prokurorisë ka ndërmarrë veprime konkrete për të lehtësuar pozitën e të arrestuarit.

Prokurori i ka thënë vëllait të të pandehurit që t’i linte paratë në një Exchange,  pasi ai “nuk prekte para me dorë”.

Më pas ka kërkuar nga Prokuroria e Përgjithshme ndryshimin e akuzës për të pandehurin Paulin Shpori, i cili sipas prokurorit duhet të akuzohej për moskallëzim krimi.

Por kjo kërkesë nuk është pranuar nga organi qendror i akuzës dhe i pandehuri është dënuar për trafikim të lëndëve narkotike me 8 vjet burg.

Arrestimi

Pasi ka krijuar bindjen se prokurori ka konsumuar veprën penale edhe pse nuk i kishte marrë paratë, Prokuroria e Krimeve të Rënda i ka kërkuar gjykatës lëshimin e urdhër-arrestit ndaj tij. Urdhri i prokurorisë është ekzekutuar rreth orës 15:00 nga autopatrullat e shqiponjës, edhe pse nga prokuroria është kërkuar që arresti të kryhej nga oficerët që kanë ndjekur hetimet e çështjes.

Sipas pamjeve filmike të shpërndara nga policia rezulton se automjeti tip “Benz” me të cilën udhëtonte prokurori Haxhi Giu është ndaluar rreth orës 15:30 dhe mes oficerit të policisë është zhvilluar një bisedë e shkurtër, pasi prokurori ka kërkuar të shkonte me automjetin e tij në polici.

Oficeri i policisë prezantohet: “Drejtoria e Policisë së Tiranës. Z. Prokuror ka dalë një urdhër arresti për ju. Ju lutem, sigurojeni në frena makinën. Zbrisni me qetësi nga makina”.

Ndërsa prokurori përgjigjet: Pse të zbres, mund të vij me makinën time.

Oficeri i policisë: Ju lutem hajdeni në makinën e policisë. Oficeri 2: Hajdeni me makinën e policisë.

Pas kësaj bisede prokurori zbret nga automjeti tip “Benz” të cilin e kishte në përdorim dhe hipën në furgonin e policisë për t’u transportuar më pas në drejtorinë e Policisë të Qarkut Tiranë.

Hetimi

Sipas një njoftimi për mediat të Prokurorisë së Përgjithshme thuhet se prokurori Haxhi Giu, ka marrë përsipër që, në këmbim të një shume parash (euro), të zbusë akuzën për shtetasin Paulin Shpori, i arrestuar dhe i akuzuar për “trafik lëndësh narkotike” në vitin 2014, së bashku me disa persona të tjerë.

Ndërkohë që çështja kundër Paulin Shpori dhe të tjerëve po zhvillohej në Gjykatën e Krujës, vëllai i të akuzuarit, shtetasi Aleks Shpori, në muajin Shtator 2015, është vënë në kontakt me prokurorin e çështjes, Haxhi Giu dhe i kërkon që, në këmbim të një shume parash, të ndihmonte Paulinin të dilte nga burgu.

Nga hetimi rezulton se prokurori Haxhi Giu ia ka bërë të qartë shtetasit Aleks Shpori se pozita procedurale e të vëllait të tij është e vështirë dhe nuk mund ta ndihmojë.

Pas këmbënguljes së shtetasit Aleks, prokurori i cakton një takim në Tiranë, fillimisht në një lokal dhe më pas së bashku shkojnë në një pikë këmbimi valutor.

Sipas hetimit, në këtë pikë këmbimi valutor, shtetasi Aleks depoziton një shumë parash, si “garanci” për shërbimin antiligjor që do t’i kryente prokurori. Pas këtij takimi, Prokurori Haxhi Giu vihet në lëvizje për të plotësuar kërkesën korruptive të shtetasit Shpori.

Prokurori Giu dërgon një informacion në Prokurorinë e Përgjithshme, sipas të cilit, nga shqyrtimi i elementëve të dosjes hetimore, duhet zbutur pozita procedurale e shtetasit Paulin Shpori, nga i akuzuar për veprën penale të “prodhimit dhe mbajtjes së narkotikëve”, në veprën penale të “moskallëzimit të krimit”.

Kjo kërkesë e prokurorit Giu nuk u pranua nga ana e Prokurorisë së Përgjithshme, e cila konkludoi se shtetasi Paulin Shpori duhej akuzuar deri në përfundim të gjykimit për veprën penale të “prodhimit dhe mbajtjes së narkotikëve”.

Në këto kushte, prokurori Giu vijon procesin gjyqësor dhe në përfundim, shtetasi Paulin Shpori dënohet me 8 vite burgim.

Në një njoftim për mediat, policia e Tiranës thotë se janë sekuestruar 29 mijë euro, të cilat prokurori i ka kthyer pasi nuk ka favorizuar dot të pandehurin. Ndërsa prokuroria deklaron se nuk dihet ende shuma e saktë që i është premtuar prokurorit Haxhi Giu dhe për këtë çështje hetimet vazhdojnë.

Prokuroria dhe policia janë përplasur sërish dje por këtë radhë për shumën e parave që i ishte premtuar prokurorit në këmbim të favorizimit të të pandehurit Paulin Shpori.

Në deklaratat respektive për mediat, policia dhe prokuroria deklarojnë të dhëna kontradiktore sa i takon shumës së parave.

Në njoftimin e Prokurorisë së Përgjithshme thuhet se prokurorit Haxhi Giu i është premtuar një shumë parash në euro, por nuk dihet ende vlera e saktë e tyre.

“Shuma e saktë që i është premtuar prokurorit do të jetë objekt i hetimit të mëtejshëm”, thuhet në njoftimin e Prokurorisë së Përgjithshme.

Ndërsa policia e Tiranës në njoftimin që lajmëron arrestimin e prokurorit thotë se atij i ishin premtuar 29 mijë euro të cilat tashmë janë sekuestruar në cilësinë e provës materiale.

“Gjatë fazës së gjykimit shtetasi Aleks Shpori është takuar disa herë me prokurorin e kësaj çështjeje, shtetasin Haxhi Giu të cilit i ka afruar shumën 29.000 euro në këmbim të ndryshimit të masës së sigurimit personal “arrest në burg” për vëllai e tij Gj. Sh”, thuhet në njoftimin e policisë së kryeqytetit.

Më pas në të njëjtin njoftim policia sqaron se nisur nga fakti se nuk është bërë i mundur ndryshimi i masës së sigurimit personal arrest me burg për të pandehurin, nga ana e prokurorit të çështjes Haxhi Giu është kthyer mbrapsht shuma prej 29.000 euro tek vëllai i tij Aleks Shpori.

“Nga ana jonë janë sekuestruar në cilësinë e provës materiale shuma 29.000 euro, DVD me pamje filmike të marra nga ambiente të ndryshme (lokale, exchange) ku janë zhvilluar takimet dhe shkëmbimi i parave ndërmjet shtetasve Haxhi Giu dhe Aleks Shpori”, thotë policia.

Ndërsa prokuroria jep një tjetër version duke thënë se pas dhënies së vendimit, prokurori i çështjes takohet sërish me shtetasin Aleks Shpori në të njëjtën pikë këmbimi valutor në Tiranë, ku i bën të ditur se, pavarësisht tentativave konkrete, nuk mund të bënte asgjë për të ndihmuar Paulinin.

“Ndërkohë, shtetasi Aleks Shpori ka tërhequr nga pika e këmbimit valutor shumën që kishte lënë “garanci” dhe është larguar pa e kryer “pagesën” ndaj prokurorit, për shkak se nuk u arrit të zbutej akuza për vëllanë e tij”, thuhet në njoftimin për mediat të Prokurorisë së Përgjithshme.

Karriera: Haxhi Giu, 23 vite në prokurori

Prokurori Haxhi Giu, i arrestuar pasditen e djeshme me akuzën e “korrupsionit pasiv”, ka një karrierë të gjatë në institucionin e prokurorisë. Ai e ka nisur punën si prokuror në vitin 1992, pas përfundimit të kursit të përshpejtuar bashkë me një numër të madh gjyqtarësh dhe prokurorësh, të cilët më pas do të bënin karrierë në sistemin e drejtësisë. Ai e nisi fillimisht punën si prokuror i thjesht dhe shumë shpejt u transferua në Prokurorinë e Përgjithshme, ku ushtroi detyrën e prokurorit deri në vitin 2008. Me ardhjen në krye të institucionit të akuzës të Prokurorisë së Përgjithshme Ina Rama, shumë nga prokurorët “e vjetër” u transferuan në prokurori të ndryshme. Njëri prej tyre ishte dhe prokurori Haxhi Giu, i cili u transferua në Prokurorinë e Krujës ku ushtroi detyrën e prokurorit deri ditën e djeshme. Në karrierën e tij si prokurori Giu ka hetuar një sërë çështjes, por më kryesorja mbetet dosja “Hajdari”. Ai ka qenë drejtuesi i një grupi prokurorësh që hetuan vrasjen e Azem Hajdarit dhe përfaqësuan në gjykim akuzën ndaj të pandehurve. Grupi i prokurorëve i përfaqësuar nga Giu kërkoi dënimin me burgim të përjetshëm për disa nga të pandehurit përfshi dhe Jaho Mulosmanin, i cili aktualisht është duke vuajtur këtë dënim.

Arrestimi i djeshëm i një prokurori ishte një “spektakël” në sytë e një opinioni publik, të lodhur nga mungesa e penalizimeve për ‘peshqit e drejtësisë’.

Ishte zgjedhur ta ndalonin pikërisht teksa po udhëtonte me makinën e tij Benz E Class, një standard i lartë për këdo që merr pagë edhe të lartë në Shqipëri.

Shumë komentues në rrjet kanë komentuar makinën e Haxhi Giut, por edhe ndërhyrjen e policisë.

“Të ishtë një qytetar i thjeshtë, do e plasnin përtokë dhe nuk do i flisnin me edukatë,” ironizojnë në rrjet.

Ka pasur edhe kritika për publikimin e pamjeve të arrestimit dhe për mënyrën e zgjedhur për ta ndaluar.

Megjithatë të shumtë janë ata që pyesin se cila është pasuria e prokurorit Giu.

Sipas gazetës Panorama, ai ka deklaruar zyrtarisht në ILDKP se ka në pronësi dy apartamente me sipërfaqe të madhe dhe një vilë katërkatëshe.

Giu thotë se ka depozita bankare me një vlerë deri në 50 milionë lekë të rinj.

Makina e tij mendohet se kushton rreth 25 mijë euro, por sipas Panoramës ai nuk e ka të deklaruar.

ILDKP do nisë hetimet për pasurinë e Giut.

Nga Ylli Dylgjeri

Dje Prokuroria ndaloi prokurorin në rrugë. Dje Policia e shoqëroi prokurorin Haxhi Giu…

E pashë në TV teksa një makinë e policisë i zinte rrugën një Mercedezi. Pasi i hapë derën e mjetit, një polic i komunikoi urdhër ndalimin shoferit prokuror që shkruante mbi një telefon.

Nuk e njoha… Sinqerisht nuk arrita ta shquaj shokun tim të fakultetit të drejtësisë. Kanë kaluar mbi 25 vite. Lexuesi i lajmit në TV sqaronte se personi quhej Haxhi Giu. Koha shpejton. Por, Haxhiun e kishte mbuluar lluksi. Dje, e mbuloi dhe turpi. U trondita.

Zoti e shpëtoftë…

Zbardhen detaje të reja lidhur me ekzekutimin e 39-vjeçarit Arben Hasa, në fshatin Shkallë të Durrësit, në afërsi të Manzës.

Korrespondeti i Ora News në Durrës, duke iu referuar burimeve zyrtare të policisë, informon se autori i dyshuar, identifikuar tashmë nga policia, por që për efekt hetimi nuk bëhet i ditur identiteti i tij, është një shok i viktimës.

Arben Hasa nga Burreli, por prej vitesh banues në fshatin Karpën të Maminasit, mësohet se ka pasur një konflikt për motive banale me autorin e vrasjes.

Ky i fundit mësohet se ka shkuar ditën e djeshme në banesën e Hasës dhe i ka kërkuar që ta transportojë me automjetin e tij.

Rrugës, në fshatin Shkallë, ai e ka qëlluar me një plumb kallashnikovi në kokë, duke i shkaktuar vdekjen e menjëhershme.

Më pas, ai e ka transportuar trupin e pajetë të Arben Hasës disa metra më tej, e ka hedhur dhe është larguar nga vendngjarja.

Policia e Shijakut dhe ajo e Krimeve të Rënda në Durrës kanë nisur kërkimet për kapjen e autorit.

Mjeti i braktisur tip BMW me targa AA 938 DR në pronësi të viktimës Hasa u gjet nga patrulla e policisë së Shijakut rreth orës 02:00 të mëngjesit të 3 dhjetorit 2015.

Në automjet janë gjetur njolla gjaku, 2 copë fishekë dhe një gëzhojë automatiku.

Ndërkohë, në orët e para të mëngjesit, në fshatin Manëz të Vjeter është gjetur trupi i pajetë i shtetasit Arben Hasa.

Edhe pse është në “arrest shtëpie” për konfliktin e armatosur në Lagunën e Patokut dy muaj më parë, deputeti Armando Prenga ka dalë nga banesa e tij në të paktën 3 raste.

Ky fakt konfirmohet për Shqiptarja.com nga burime pranë Prokurorisë së Përgjithshme, organ i cili ka ngritur shqetësimin për shkeljen e masës së sigurisë nga ana e deputetit.

Prokuroria i kërkon Policisë së Shtetit marrjen e masave për respektimin e “arrestit në shtëpi” që Gjykata ka vendosur ndaj Prengës për konfliktin me anëtarët e familjes Cali dhe përdorimin e armës pranë komisariatit të Kurbinit që solli edhe të plagosur.

Të njëjtat burime thanë për Shqiptajra.com se dy javë nga ndryshimi i arrestit nga burg në shtëpi janë grumbulluar informacione zyrtare se Prenga e ka shkelur masën 3 herë duke dalë nga banesa për takime me persona të ndryshëm.

Mos respektimi i arrestit me burg -sqaron organi i Akuzës – mund të sjellë arrestimin nga e para të Armando Prengës dhe ndryshimin e masës ndaj tij.

Një nënë, bashkëshorti i së cilës rrezikon të deportohet nga Britania pasi ishte kyçur në burg për dhunë në familje, ka bërë një lutje dëshpëruese që atij t’i jepet një shans i dytë.

Shqiptarja Viola Gjeloshi, 30 vjeç, thotë se burgu e ka ndryshuar burrin e saj, me të cilin ka dhjetë vjet e martuar.

Së bashku kanë dy fëmijë.

Viola tha se është shkatërruar nga lajmi se Viktor Gjeloshin, 31 vjeç, do e kthejnë në Shqipëri.

Gjeloshi u dënua me 16 muaj burg për një rrahje jashtë një pub-i.

Ai u dënua edhe me katër muaj për dhunë në familje.

Viola thotë se jeta e ish-hidraulikut shkoi drejt greminës pasi i vdiq babai në vitin 2007.

“E kam falur dhe kemi ecur përpara. E kam vizituar në burg disa herë,” thotë ajo për Mirror.

“Burgu e ka ndryshuar shumë. Tani ai do të jetë pranë familjes. Djemtë i merr malli për të. Ata mendojnë se ai është në punë. I mora për vizitë në burg dhe ata menduan se kjo është zyra e tij. Ishte kaq prekëse”.

“Ata i thanë se ka bërë mjaft para dhe tani duhet të kthehet në shtëpi. Nëse e deportojnë për në Shqipëri, si t’ua them atyre”.

Një 24-vjeçare shqiptare në Shtetet e Bashkuara të Amerikës është arrestuar nga policia pasi mashtroi një 84-vjeçar duke i marrë 100 mijë Dollarë. Anisa Llega punonte si pastruese prej 3 muajsh në shtëpinë e të moshuarit, të cilin e kishte njohur në restorantin ku ajo punonte si kamariere dhe 84-vjeçari ishte klient i përhershëm.

Shumë interesante është mënyra si ajo i mori të moshuarit 100 mijë Dollarë. 24-vjeçarja kishte sajuar sikur ishte e sëmurë me kancer në tru dhe e bindi 84-vjeçarin që t’i jepte 30 mijë Dollarë për të bërë operacionin.

Më pas i kërkoi sërish para për të paguar kredinë e shkollës dhe fatura të tjera. Por, pas një hetimi rezultoi se shqiptarja nuk vuante nga asnjë sëmundje dhe gjatë kohës që pretendonte se ishte në operacion, në fakt ka qenë me pushime në Majemi.

Ngjarja ka ndodhur në Arlington dhe policia tha se Anisa Llega ishte në gjendje të merrte më shumë se 100 mijë Dollarë në rast se nuk do të ishte zbuluar loja e saj.

Ministrja e Mbrojtjes Mimi Kodheli ka publikuar një album fotografik në profilin e saj në Facebook.

Ajo shkruan se “Garnizoni “Skënderbej” ka marrë një pamje tjetër plot ngjyra këto ditë. Gumëzhin me provat për festën e nesërme. 103 vjet shtet. 103 vjet Forca të Armatosura. Nesër festa!”.

Por me të drejtë disa komentues i vënë në dukje: Po tanket ku janë?

Sa të kemi NATO-n, ka kush na mbron….

Mbrëmjen e së enjtes, specialistë të Shërbimit për Çështjet e Brendshme dhe Ankesat (SHÇBA) në Ministrinë e Punëve të Brendshme, në bashkëpunim me njësinë “task-forcë” të Prokurorisë së Shkodrës kanë mundur të arrestojnë një punonjës policie në qytetin e Shkodrës, të akuzuar për “korrupsion pasiv”.

Arrestimi i punonjësit të policisë, Ardian Çuli, është bërë pas një hetimi dymujor nga SHÇBA, në funksion të një procedimi penal të regjistruar ndaj tij po gjatë këtij viti, ndërkohë që për këtë shtetas ishte dhënë nga Gjykata e Shkallës së Parë në Shkodër edhe masa e sigurimit personal “arrest me burg”, për veprën penale të parashikuar nga neni 259 i Kodit Penal.

Nga hetimet është provuar se në disa raste, oficeri i policisë lejonte shtetas të ndryshëm, kundrejt përfitimit dhe duke shpërdoruar detyrën, të prisnin dhe të tregtonin drurët e pyjeve në mënyrë të kundërligjshme.

Ngjarja ndodhi në hyrje të rrugës që të dërgon në aeroportin e Rinasit, pranë fshatit Kashar. Autorët qëlluan me armë dhe kërcënuan rojet e sigurisë, që transportonin paratë për një bankë të nivelit të dytë. Aksioni për kapjen e grabitësve dhe dyshimet se është një grup kriminal që vepron në zonën Fushë Krujë-Laç.

Grabitje me armë dhe maska në mes të rrugës që të çon për në aeroportin e Rinasit.

Ngjarja ndodhi rreth orës 13:30 të ditës së djeshme, në dalje të fshatit Kashar, ku katër persona të armatosur i zunë pritë një automjeti transportues parash të blinduar dhe dy të tjerave që e shoqëronin dhe nën kërcënimin e armëve arritën që të merrnin një shumë të madhe parash.

Dyshohet se shifra kap vlerën e mbi 2 milionë eurove, ndonëse ende nuk ka një konfirmim zyrtar nga ana e policisë.

Këto para ishin destinuar të transferoheshin jashtë vendit nga një bankë e nivelit të dytë. Sipas policisë, dy automjetet e sigurisë private, një furgon i blinduar me targa TR 46 17 L dhe automjeti tjetër shoqërues po i kësaj shoqërie fizike me targa AA 169 DF, ishin duke udhëtuar në drejtim të Rinasit, kur iu ndërpre rruga nga një automjet tip fuoristradë me targa TR 8801E, në të cilin dyshohet se udhëtonin disa persona.

Personat pasi janë larguar me automjetin e tyre tip Fuoristradë, e kanë braktisur atë. Ndërsa kanë rrëmbyer shumën e madhe të parave.

Ngjarja

Gjithçka ishte e zakontë për kompaninë e sigurisë, e cila po transportonte shumat e mëdha të parave. Një automjet i saj ishte para me dy efektivë të armatosur, tjetri qëndronte pas dhe në mes  vijonte rrugën mjeti i blinduar që kishte vlerat monetare.

Me procedurë sigurie gjithçka ishte në rregull, por në hyrje të aksit që të dërgon për në Rinas, një makinë me fenelinë policie lart u pret rrugën dhe katër persona të armatosur, të maskuar dhe me jelekë antiplumb që shërbejnë për forcat e rendit, nisin të qëllojnë në ajër dhe u afrohen mjeteve ku gjendeshin efektivët që shoqëronin shumat e parave.

Nën kërcënimin e armëve, ata detyruan rojet private që të ngrinin duart lart dhe më pas hynë në furgonin e blinduar dhe prej aty dyshohet se kanë marrë të paktën katër thasë me para, që arrijnë në vlerën e mbi 2 milionë eurove.

Përveç kartmonedhave, dyshohet se ka pasur edhe sasi të vogël ari.

Deri tani, policia ka shoqëruar 20 persona, mes të cilëve edhe 6 punonjës të kompanisë së sigurisë. Gjithçka në grabitje ka zgjatur pak më shumë se dy minuta dhe pasi morën shumat e mëdha, u larguan me automjetin e tyre, një fuoristradë tip “Jeep” dhe u futën në rrugët dytësore të fshatit Kashar.

Teksa konstatuan se po afroheshin forcat e rendit, grabitësit për të mbuluar çdo gjurmë të mundshme i vunë flakën automjetit dhe më pas ka të dhëna se lëvizën me një tjetër makinë.

Kjo ngjarje konsiderohet si tepër e rëndë, pasi grabitje të ngjashme janë të përsëritura në Tiranë dhe qytete të tjera të vendit. Ka dyshime se ky grup mund të jetë aktiv në ksin Fushë Krujë-Laç, por ende nuk kanë shkuar deri në persona konkretë.

Hetimet

Nga të dhënat e para të policisë dyshohet se personat e armatosur kishin dijeni mbi lëvizjen e parave, pasi kompania e sigurisë e ka kryer edhe më parë transportin e vlerave monetare të cilat i dërgonte kryesisht në bankat e nivelit të dytë dhe në pikat e shkëmbimit valutor që gjenden në Aeroportin e Rinasit.

Ndërsa mënyra e grabitjes sipas ekspertëve lë të kuptohet se kanë të bëjnë më një grup të strukturuar kriminal, pasi jo vetëm kanë gjetur momentin për të ndërhyrë befasisht, por janë kujdesur që të mbajnë veshur uniforma të ngjashme me ato të repartit të Ndërhyrjes së Shpejtë.

Edhe nga dëshmitë e rojeve të sigurisë mësohet se fillimisht kanë menduar se ishin punonjës policie, por pasi nisën të qëllonin në ajër dhe kërcënonin, e kuptuan se bëhej fjalë për grabitje.

Gjithsesi, që të gjithë personat që transportonin vlerat monetare janë marrë në pyetje dhe vijojnë të qëndrojnë në ambientet e Drejtorisë së Policisë së Tiranës, pasi mund të rrezikojnë edhe ndonjë ndalim të mundshëm.

Për hetuesit mbetet ende e paqartë sesi rojet private nuk kanë mundur të reagojnë, sepse ishin gjashtë efektivë të armatosur dhe nuk kanë bërë përpjekje për t’i ndjekur as pasi ndodhi ngjarja. Po hetohet edhe ndonjë bashkëpunim i mundshëm i personave të brendshëm, të cilët kishin dijeni për lëvizjen e shumave të parave.

Efektivë të policisë së rendit të ndihmuar edhe nga Forcat e Ndërhyrjes së Shpejtë kanë ndërmarrë një aksion të gjerë në zonën e Kasharit, për të bërë të mundur arrestimin e katër autorëve të dyshuar, ndërsa mendohet se të paktën tre të tjerë janë bashkëpunëtorë të tyre.

Duke marrë në konsideratë edhe vendin ku ka ndodhur ngjarja dhe më pas braktisja e automjetit në një rrugë dytësore në Kashar, nuk përjashtohet mundësia që autorët të jenë ndarë dhe fshehur në kodrinat pranë këtij fshati.

Përgjatë gjithë pasdites në atë zonë ka pasur shërbim të përforcuar, por ende nuk kanë arritur në ndalimin e autorëve.

Postblloqe të policisë u ngritën edhe në hyrje-daljet e Tiranës dhe të Durrësit. Pak muaj më parë, një bankë e nivelit të dytë në kryeqytet u grabit në rrethana shumë të mistershme, ku bëhej fjalë për një shumë të madhe që shkon deri në pesë milionë euro.

Gjithashtu, në këtë aks një tjetër kompani e sigurisë ka rënë pre e grabitjes.

Prokurori Giu u “dekonspirua” nga vëllai i të pandehurit që do favorizonte. Në takimin e fundit me vëllezërit e të pandehurit në një exchange në qendër të Tiranës, prokurori Haxhi Giu ka marrë 200 euro nga Aleks Shporti, pasi ky i fundit ka tërhequr paratë e lëna si garanci. Më pas ata janë takuar përzemërsisht dhe pak kohë më pas, Shporti është ndaluar nga policia në Rinas, bashkë me shumën e parave të sapotërhequra në pikën e këmbimit valutor.

Dëshmia e vëllait të të pandehurit që do favorizohej nga prokurori Haxhi Giu, ka qenë prova më e rëndësishme për Prokurorinë e Krimeve të Renda, e cila dy ditë më parë kërkoi arrestimin e prokurorit të dyshuar për korrupsion.

Në fund të muajit tetor, policia ndalon një automjet në afërsi të aeroportit të Rinasit, me të cilin udhëtonin dy vëllezërit Paulin dhe Aleks Shporti.

Nga kontrolli i mjetit u sekuestrua shuma prej 28 mijë e 800 eurosh, e cila sapo ishte tërhequr nga një pikë e këmbimit valutor në Tiranë.

Pas marrjes në pyetje, Aleks Shqarri ka deklaruar se këto para i ishin premtuar prokurorit Haxhi Giu në këmbim të zbutjes së akuzës ndaj vëllait të tij, i arrestuar për prodhim dhe mbajtje të lëndëve narkotike, çështje e cila po gjykohej në Gjykatën e Krujës.

Sipas prokurorisë, ky është edhe momenti kur ka nisur hetimi për prokurorin, i cili gjatë bisedave me vëllain e të pandehurit mbante qëndrim mohues për çështjen, ndërsa rezulton që zyrtarisht ka kërkuar zbutjen e akuzave të të pandehurit Shporti.

Sipas prokurorisë, rezulton se Haxhi Giu ka marrë shumën e 200 eurove nga Aleks Shporti gjatë kohës që ai ka tërhequr nga pika e këmbimit valutor paratë e lëna si garanci për prokurorin.

Nga hetimi i zhvilluar rezulton se në shtator të këtij viti, gjatë kohës që zhvillohej gjyqi ndaj shtetasit Gjon Shportit dhe të pandehurve të tjerë, vëllai i tij, Aleksi ka shprehur dëshirën për të folur me prokurorin e çështjes, Haxhi Giu.

Avokati mbrojtës e ka prezantuar me prokurorin Giu dhe ky i fundit i ka thënë vëllait të të pandehurit të takoheshin pas një jave në Tiranë. Fillimisht janë takuar në këmbë dhe më pas janë ulur në një kafe pranë qendrës së kryeqytetit.

Gjatë këtij takimi, Aleks Shporti i ka kërkuar prokurorit të ndihmonte vëllain e tij dhe dy nga të pandehurit e tjerë në procesin gjyqësor kundrejt një shpërblimi prej 30 mijë eurosh, nga 10 mijë euro për secilin.

Ai ka insistuar te prokurori, i cili i ka thënë se kur të kishte shumën e parave, mund ta linte tek një pikë këmbimi valutor, ku dhe më pas ka shkuar personalisht, por vëllait të të pandehurit i ka thënë se çështja është shumë e vështirë.

Pasi kanë shkëmbyer numrat e telefonit, ata janë takuar sërish pas disa ditësh në të njëjtin lokal dhe këtë radhë, vëllai i të pandehurit kishte me vete edhe shumën e parave, të cilat ka insistuar t’ia lërë prokurorit.

Prokurori Giu i është përgjigjur se ai nuk i mban paratë, por meqenëse po insistonte, mund t’i linte paratë në pikën e këmbimit valutor. Sipas prokurorit, çështja është shumë e vështirë dhe vëllai i tij nuk mund të dilte nga burgu.

Ata janë çuar të dy nga lokali dhe kanë shkuar në pikën e këmbimit valutor, ku shtetasi Aleks Shporti ka depozituar një shumë të konsiderueshme parash si garanci që nëse bëhej gjë për të vëllain, këto para do ishin të prokurorit.

Në datën 29 tetor është dhënë pretenca për vëllain e tij, Gjon Shporti, ku prokurori Haxhi Giu ka kërkuar dënimin e tij me 8 vjet burg.

Pas seancës ata janë takuar sërish dhe prokurori i ka thënë se i vinte keq që nuk kishte mundur ta ndihmonte dhe po atë ditë duhet të takoheshin që Aleksi të merrte “gjerat e tij” në Tiranë.

Ata janë takuar sërish dhe të dy bashkë kanë hyrë në exchange, ku punonjësi ka nxjerrë një shumë të konsiderueshme eurosh, të cilat ia ka dhënë Aleksit.

Pasi i ka futur në një zarf, Aleksi ka nxjerrë katër kartëmonedha 50 euro dhe ia ka dhënë prokurorit Haxhi Giu, duke e falenderuar edhe pse nuk ishte bërë i mundur lehtësimi i akuzës së vëllait të tij.

Prokuroria thotë se dhënia e parave dhe takimet e prokurorit me vëllain e të pandehurit konfirmohen nga pamjet e kamerave të sigurisë së exchange.

Pas dhënies së shumës prej 200 eurosh, prokuroria thotë se vëllai i të pandehurit dhe prokurori Giu janë takuar përzemërsisht.

Rreth 40 flamuj shqiptarë u vendosën përgjatë rrugës ‘Summer Street’ në qytetin amerikan Stamford, në nderim të Ditës së Pavarësisë së Shqipërisë.

Në qytetin ku jetojnë më shumë se 3 mijë shqiptarë, kjo është hera e parë që flamujt u vendosën edhe përgjatë kësaj rruge.

Kjo është vepër e biznesmenit dhe filantropit shqiptaro-amerikan, Riçard Lukaj.

Megjithatë këshilltarët vendorë kanë nisur një debat nëse flamujt duhej të vendoseshin dhe përse duhej të qëndrojnë një javë.

Disa thonë se duhet saktësuar protokolli për këtë çështje.

Vetë qytetarët nuk duken edhe aq të shqetësuar.

Një prej tyre tha se nuk i kishte vënë re.

“Kisha mendime të tjera në kokë, sidomos në këtë kohë të vitit,” tha ai.

Policia e Tiranës ka arrestuar 6 punonjësit e policisë private një ditë pas grabitjes së parave në makinën e kësaj kompanie.

Në njoftimin e policisë, të shpërndarë për mediat, thuhet se në pranga kanë rënë: Alban Sharra, 43 vjeç, banues në Tiranë; Agron Ademi, 44 vjeç, banues në Tiranë; Agron Lloha, i datëlindjes 07.01.1968, banues në Tiranë; Niko Prifti, 38 vjeç, banues në Tiranë; Eduard Metollari, 32 vjeç, banues në Tiranë, të cilët kishin për detyrë ruajtjen dhe transportin brenda rregullave të vlerave monetare.

Po ashtu në pranga ka rënë edhe administratori i shoqërisë, 45-vjeçari Artan Mane.

Këta shtetas u arrestuan sepse në Qafë Kashar-Rinas, afër kthesës së Laknasit, 5 persona të armatosur, kanë qëlluar dy herë në ajër me armë zjarri dhe kanë goditur me mjete të forta xhamin e mjetit transportues, ku kanë marrë një sasi lekësh që po transportoheshin nga eksorta e SHPSF “Rogat Security 1”.

Në afërsi të urës së Limuthit është gjetur tërësisht i djegur mjeti markës “Jeep Grand Cherokee”, me të cilin autorët kishin kryer grabitjen.

Në vendin e ngjarjes u gjetën me cilësinë e provës materiale dy gëzhoja kalibër 7.65 mm, dy fishekë luftarake model 56, një predhë e dëmtuar, një fenelinë policie, dy leva hekuri.

Dy persona kanë gjetur vdekjen dhe dy të tjerë kanë mbetur të plagosur si pasojë e një aksidenti të rëndë rrugor të ndodhur paraditen e kësaj të premteje në Fushë-Bulqizë.

Ngjarja e rëndë është regjistruar në aksin kombëtar që lidh qytetin e Bulqizës me atë të Peshkopisë.

Dy automjetet, një tip Mercedes Benz me targa AA733CG dhe një Land Rover me targë AA383FE, janë përplasur me njëra-tjetrën, ku si pasojë kanë mbetur të plagosur katër persona.

Sipas informacioneve paraprake të policisë, dy shtetaset Zylfije dhe Sadete Kryemadhi, motra me njëra-tjetrën, kanë gjetur vdekjen rrugës për në spital, ndërkohë që raportohet për një fëmijë 10-vjeçar në gjendje të rëndë që pritet të niset me helikopter drejt Tiranës për mjekim më të specializuar.

Policia ndodhet në vendin e ngjarjes dhe po heton për zbardhjen e dinamikës së saj, ndërkohë që paraprakisht besohet se shkak i aksidentit të jetë bërë prania e akullit në rrugë.

Ambasada amerikane në Tiranë reagoi pas lajmit për dënimin e pesë personave që dërgonin klandestinë në SHBA.

“Ambasada e SHBA në Tiranë mirëpret dënimin e djeshëm të pesë personave për kontrabandë të qënieve njerëzore. Organizata kriminale ku ata bëjnë pjesë është përgjegjëse për hyrjen e paligjshme në Shtetet e Bashkuara të më shumë se 600 shtetasve shqiptarë gjatë periudhës së shkurtër që ishte në veprim. Ajo shfrytëzoi shpresat dhe ëndrrat e emigrantëve të mundshëm, duke i vënë ata në rrezik ndërsa siguroi mbi 15 milionë dollarë si të ardhura kriminale.

Dënimi i djeshëm është rezultari i një hetimi të përbashkët të disa agjencive nën udhëheqjen e Byrosë për Sigurinë Diplomatike në Departamentin e Shtetit, në bashkëpunim të ngushtë me Policinë e Shtetit Shqiptar dhe Zyrën e Prokurorisë së Krimeve të Rënda.

Kontrabandimi i emigrantëve është një krim i rëndë dhe Shtetet e Bashkuara janë të angazhuara të ndjekin penalisht kontrabandistët sipas të gjitha hapësirave të ligjit amerikan dhe atij shqiptar. Përdorimi i shërbimeve të një kontrabandisti njerëzish për të mbërritur në Shtetet e Bashkuara është i paligjshëm dhe vendos emigrantë të mundshëm para një mundësie të lartë shfrytëzimi dhe rreziku,” thuhet në deklaratë.

Kryebashkuaku i Tiranës ka nisur një dialog në rrjetete sociale me qytetarët.

“Po vijnë festat në Tiranë! Për pak ditë jemi gati në të gjithë qytetin, por si fillim ja prova e Sahatit. Si ju duket?”, – shkruan ai.

Fotot e mëposhtme paraqesin zbukurimet e qytetit edhe në disa rrugë të tjera, veç qendrës.

Nje komentuese i shkruan: “Nuk e kam pare kurre me buur Sahatin ne 6 vitet e fundit”.

Dikush tjeter ia kthen: “Tirana nuk eshte vetem blloku, zbukuro edhe rruget e tjera!”.