U deshën javë të tëra që protagonistët e shumtë të një udhëtimi me avion të ish-kryeministrit Aleksandër Meksi të rrëzojnë poshtë pretendimet se kishte një plan për eliminimin e tij fizik në vitin 1992.
Gjithçka erdhi pas një akuze të bërë nga ish-truproja e Sali Berishës, Izet Haxhia.
Por sërish në skenë dalin akuzat për vrasjen e mundshme të Meksit.
Këtë herë është Andrea Dimushi, një ish-zyrtar i SHIK në kohën kur kjo strukturë drejtohej nga Bashkim Gazidede.
Sërish e përditshmja Dita dhe prapë akuzat janë tronditëse.
Por pyetja që lind është kjo: Përse tani?
Dimushi ka pasur kohën dhe mundësinë t’i bënte këto akuza prej vitesh.
Vetë Dimushi është larguar vitin e shkuar për në Austri, në kërkim të një jete më të mirë, njësoj si dhjetëra-mijëra shqiptarë.
Për mediat, ai tha se e kanë kërcënuar falangat e vjetra.
Por nuk tregoi se përse nuk ka bërë denoncim ndaj atyre që e kanë përndjekur e kërcënuar.
Të shumtë janë ata shqiptarë që duan të marrin azil në vendet e BE me metoda nga më të ndryshmet.
“Telegraph” i Anglisë denoncoi para pak ditësh çështjen e gjakmarrjes si një kartë false për të përfituar.
A është ky rasti i Dimushit?
Askush nuk e di me siguri, por vetë ish-zyrtari i SHIK dhe të tjerë nuk japin asnjë arsye se përse Berisha do kërkonte një eliminim fizik të Meksit, kur e kishte shumë lehtë të realizonte një eliminim politik.
Ish-zyrtari i SHIK: Meksin do e vrisnim me snajperë rusë
Pak ditë pasi ish-truproja e Sali Berishës, Izet Haxhia, spekuloi se ka pasur një plan për të vrarë ish-kryeministrin Aleksandër Meksi, duke inskenuar një aksident ajror, ja ku vjen një tjetër akuzë e rëndë.
Ish-shefi i SHIK në Pogradec dhe në Korçë, Andrea Dimushi, thotë se ka pasur një plan për ekzekutimin e Meksit në vitin 1994.
“Dua të veçoj se Meksi është burrë shumë i zgjuar, por jo trim përballë një përbindëshi si Sali Berisha,” thotë ai për gazetën Dita.
Ai thotë se nuk e di arsyen se përse duhej eliminuar Meksi.
“Di të them se Bashkim Gazidede e urrente verbërisht Meksin dhe nuk e fshihte”.
Dimushi shton se zyra e kryeministrit Meksi përgjohej rregullisht dhe nonstop.
Më pas ai rrëfen një takim në zyrën e Gazidedes, ku dikush solli një pako të rëndë.
“Me pak përpjekje e hapëm pakon. Ishin dy pushkë snaiper. Njëra tip normal nga ato të përdorura me shumë sukses gjatë Luftës së Dytë Botërore, tjetra një Simonov, një perlë e ushtrisë ruse”.
Më pas, Gazidede i kërkon që njerëzit e Dimushit në SHIK, Kazazët, të eliminojnë Meksin.
“Ma thoni shqip se çfarë duhet të bëjnë, pyeta. Ta heqin qafe se nuk i dihet askujt ‘mustaqja’, ishte përgjigjia”.